Titolo:

BONANOTE FIUME poesia di Giulio Scala

letta da B. Nacinovich (3:20)

Testo:

Me son insognado che son tornado
a passeggiare per le rive
Mi solo
Vardando - lontàn - le luci dei
pescadóri
Brilàr come stèle

I cocai i dormi sui còpi dei magasini.

Sul cantón de Braida,
In Viàl
Intorno ai ferài,sofigadi nel verde
Gira la ronda
dei pipistrèi.

Sera de estate.

Tiepida la xe l'aria, la ga odòr de mar
E de scombri rostidi sul carbòn
Dai ciosòti, cuciadi
Sul ponte del bragòzo.

Su'l bragozo vizin
la fiàma del carburo,la ilùmina le fete
de anguria
Colòr del sangue.

Un altro el ga già molà le zime
E - col motòr che el tosìsi soto voze -
El passa piàn piàn su l'acqua nera
Davanti del Molo Scovazze .

Abazia la sintìla de mile luci
Chè le trèma.

Drio del Mololungo un rimorciadòr
El ne mostra el rosso :
El va verso Porto Baross.

Una bava de ventisèl la me fa grìzoli
Sul brazo...

Xe ora de andar a casa.
Verso Bonaroti,
Suso per le strade e scalete
Indormenzàde.-

Davanti de una ostarìa
Col rolò metà serado
E con dò tavolini-in scuro-sul marciapìe
Se vedi el puntìn rosso
De un spagnolèto impizado.

Un gato bianco cole macie nere
El traversa cùcio cùcio la strada
In pùnta de pìe.

Bonanòte Fiume.

Arrangiamenti, basi e registrazione – Bruno Nacinovich